politicians


Rais Kikwete alitoa hotuba mbili mwezi uliopita. Kwanza, aliongea na Wazee wa Dar es Salaam, Diamond Jubilee Hall. Mwisho wa mwezi, tulisikia hotuba yake ya kufunga mwezi.

Alivyosema Rais kwenye hotuba yake kwa wananchi kwa mwezi wa pili, ulikuwa “mwezi wa matukio makubwa ya kukumbukwa kwa miaka mingi ijayo”. Bado haipatikani kwenye tovuti ya serikali, lakini ipo kwa Michuzi. Bonyeza hapa. Kwa hotuba kwa Wazee, bonyeza hapa.

Kuhusu Richmond, Mh. Rais hajakosea – tuliona matukio makubwa. Lakini baada ya kusikiliza na kusoma hotuba zake, nadhani angefurahi tuyasahau. Soma yafuatayo:

Nchi yetu ilipata mtikisiko mkubwa na wananchi wengi walikuwa katika hali ya mkanganyiko, wakati mwingine walikuwa wakijiuliza maswali mengi yaliyokosa majibu kuhusu hatma ya taifa letu.

Siyo siri, tumejiuliza maswali mengi. Lakini kutoka kwa Rais mwenyewe, hamna majibu. Alitusimulia kuhusu vikao vya Kamati ya Uongozi ya Chama na Kamati ya Wabunge wote wa CCM baada ya ripoti ya Mwakyembe kuwasilishwa. Najiuliza, je, walijadiliana nini? Taarifa za vikao zilipendekeza nini? Au, kusema wazi, nani alimlinda nani katika majadiliano hayo?

Wengi wamejiuliza maswali, hasa kuhusu Lowassa, harakati zake na mahusiano yake na Rais. Rais mwenyewe amlisemaje?

Napenda kuitumia nafasi hii kumshukuru sana Mhe. Edward Lowassa kwa moyo wake wa uzalendo na kwa utumishi wake kwa taifa letu. Ameitumikia nchi kwa jitihada kubwa katika nyadhifa mbalimbali mpaka kufikia kuwa Waziri Mkuu. Katika miaka hii miwili amefanya kazi kubwa ya kusukuma mbele gurudumu la maendeleo la taifa letu. Ameacha alama za kudumu za kipindi chake cha miaka miwili. Yaliyotokea ni ajali katika maisha ya siasa, lakini naamini historia itamhukumu kwa haki stahiki

Zaidi ya hapo, ametuambia kuwa:

Nchi yetu tayari imerudia hali yake ya kawaida na kila mmoja wetu anaendelea na shughuli zake.

Yaani, sina maneno ya kuelezea mshtuko wangu kwa maneno hayo. Waziri Mkuu, ameomtuhumiwa kwa ufisadi mkubwa kupita kiasi, na pia amekosa heshima kwa wananchi atahukumuliwa na historia! Aidha, sisi tunaendelea na shuguli zetu bila wasiwasi baada ya kutulizwa na Rais. Je, Rais alikuwa anamlenga nani kwa maneno hayo? Wananchi? Wazee? Au wenzake wa Chama?

Kwenye hotuba yake ya kufunga mwezi, hana usemi kuhusu mambo hayo. Rais ameendelea na shughuli zake za kumpokea Bush na kutembelea Kenya. Basi. Wakati huo huo, Waziri Mkuu aliyejiuzulu, amejifagilia kwenye TVT.

Mwisho wa mwezi, tulichanganyikiwa na mambo ya Jambo Forums. Utakumbuka kuwa tovuti hiyo ilifungwa kwa muda, na watu wawili walikamatwa. Kitu kinachosikitisha ni hiki: kwanini imebidi tutegemee shirika kutoka nje (Committee to Protect Journalists) kupata taarifa nzima na wazi ya kashfa hiyo. Soma makala yao hapa. Tumepata kila kitu – majina, sababu za kukamatwa, hadi jina la mwanasheria wao (Tundu Lissu, mwanasheria wa CHADEMA).

Matukio ya Richmond na Jambo Forums yametuonyesha kuwa safari ya kufikia uwazi na ukweli hapa Tanzania bado ni ndefu.

Je, umeshasoma ripoti ya Mwakyembe? Si unajua jinsi viongozi walivyokula? Dakika arobaini zilizopita, wabunge walikubali uteuzi wa Mizengo Pinda, Mbunge wa Mpanda Mashariki, kama Waziri Mkuu. Walimsifia. Walimpa moyo. Aliwashukuruu. Sitta alifunga kikao kwa mtindo wake. Lakini kumbe, alipewa karatasi kutoka kwa mmoja wao. Mbunge huyo alikuwa na swali….. “je, sherehe ya kumpongeza Waziri Mkuu itafanyika lini?”

Kashfa ya siku hizi ilielekea kuvunja siasa yetu. Mbunge huyo anafikiria nini? Chakula tu!

“Utawala bora unalipa.” Haya ndiyo maneno ya Bw. Bertie Ahern, Waziri Mkuu wa Ireland, kwenye hotuba yake kwa wananchi wa Ireland ambao wanaishi hapa Tanzania. Soma hotuba nzima kwa kubonyeza hapa.

Pia, kwenye hotuba hiyo aliwasimulia wageni kuhusu mkutano wake na Rais Kikwete.

I commended the President for the very strong statements he has made on the need to tackle corruption. He acted decisively, openly and publicly following the recent independent international audit on the Bank of Tanzania.

His message to the people of Tanzania, to fellow African countries and to the wider international community is clear: Corruption has no place in a democratic society.

Lakini Bw. Bertie alisahau kuwaambia kuwa wapinzani pale Ireland wamedai kuwa yeye hastahili kuwa Waziri Mkuu kwa sababu chombo kimoja cha dola kinamchunguza kwa kutolipa kodi ya mapato wakati alipokuwa Waziri wa…………. Fedha.

Chanzo cha uchunguzi huo ni uchunguzi mwingine unaohusu mipango ya ardhi. Uchunguzi, unaojulikana kama Mahon Tribunal, umegundua kuwa Bw. Bertie alipokea malipo ya thamani ya zaidi ya Euro60,000 kutoka kwa wafanyabiashara mbalimbali kati ya mwaka 1993-94. Bertie ameshindwa kueleza kwanini walimpa pesa kiasi hicho wakati alikuwa Waziri wa Fedha.  Sasa mamlaka ya kodi ya Ireland wanamchunguza pia kujua kwanini hakulipa kodi ya mapato kwenye malipo hayo. Maelezo zaidi yanapatikana hapa.

Zaidi ya hapo, Bw. Bertie alifagilia umuhimu wa uhuru wa vyombo vya habari alipozungumza na wahariri wa magazeti mbalimbali ya Tanzania. Lakini nilishangaa Bw. Bertie alikataa kujibu swali lolote kuhusu madai ya wapinzani wake wakati wa ziara yake.

Mbona wafadhili wanatufundisha mambo ya utawala bora wakati wao wenyewe wanachunguzwa?

Mwezi uliopita, nilikosa sherehe ya Poverty Week. Imefanyika Ubungo Plaza, kama uzinduzi wa kampeni dhidi ya ‘trafficking’. Shughuli nyingi zimetokea, uzinduzi wa Views of the People 2007 ni mmojawapo.

Views of the People 2007 ilizinduliwa na Prof. Semboja, mkurugenzi wa Research for Poverty Alleviation (REPOA). REPOA ilifanya utafiti huu mkubwa kwa ajili ya kupata maoni ya wananchi kuhusu utekelezaji wa Mkukuta. Walihoji zaidi ya watu 8,000 katika mikoa kumi ya Tanzania bara. Ripoti ni ndefu. Nitaweka matokeo machache tu hapa.

Asillimia ya watu ambao wamesikia Mkukuta                                                38

Asilimia ya watu ambao wanaamini maofisa wa NGOz                                 12

Asilimia ya watu ambao wanaamini polisi                                                         12

Asilimia ya watu ambao wanaamini wanasiasa                                               14

Asilimia ya watu ambao wanadhani watu kwa ujumla wanaaminika         22

Kwenye ripoti hii kuna mambo mengi ya kutafakari. Lakini nashangaa ripoti hapatikani kwa urahisi. Labda REPOA hawawaamini wananchi…. Haionekani kwenye tovuti yao. Haionekani kwenye tovuti ya kitengo cha kupima umaskini cha Wizara ya Mipango, Uchumi na Uwezeshaji (pia, tovuti hiyo inapatikana kwa kiingereza tu). Kwanini, jamani? Wamepima maoni ya wananchi lakini wananchi hawana fursa ya kusikia sauti zao wenyewe. Imeshazinduliwa kwa ‘wadau wa umaskini’ kwa sherehe ya Poverty Week. Maskini wenyewe, je?